Pariki y’Igihugu y’Akagera yatangaje ko mu mezi atatu kuva muri Mata kugera muri Kamena 2026 yinjije arenga miliyoni imwe y’Amadolari ya Amerika bigaragaza ubwiyongere bwa 4% ugereranyije n’uko byari bimeze mu gihe nk’icyo cya 2025.
Ni ibyasohotse muri Raporo y’ibikorwa by’iyi pariki hagati ya Mata na Kamena 2026 yashyizwe hanze kuri uyu wa Mbere, tariki 27 Nyakanga 2026.
Yatangaje ko aya mafaranga yaturutse muri ba mukerarugendo 8.919 bayisuye muri icyo gihe aho ugereranyije buri mushyitsi yakoresheje amadolari agera kuri 108$.
Pariki y’Akagera yatangaje ko aya mafaranga yaturutse mu bikorwa bitandukanye birimo by’ubukerarugendo n’amahoteli, birimo amafaranga yo kwinjira muri Pariki, serivisi z’abayobora ba mukerarugendo, amafaranga ava mu macumbi, amafaranga atangwa n’abahawe uburenganzira bwo gukorera ibikorwa by’ubucuruzi muri Pariki, uburobyi n’ibindi.
Yatangaje ko bitewe no kwiyongerakw’amafaranga yinjira buri kwezi, igipimo cy’ubushobozi bwa Pariki bwo kuyifasha mu bikorwa byayo cyazamutse, kiva kuri 76% cyariho muri Mata kigera kuri 104% muri Kamena 2026.
Ibi byafashije Pariki gutera intambwe igana ku kwigira mu bijyanye n’imari no kugira ubushobozi burambye bwo gutera inkunga ibikorwa byo kubungabunga ibidukikije no guteza imbere imibereho y’abaturage.
Muri icyo gihembwe kandi, Pariki y’Akagera isobanura ko havutse inkura eshatu zirimo imwe y’umukara n’ebyiri z’umweru.
Ubuyobozi bwa pariki bwatangaje ko ukuvuka kw’izi nkura ari ikimenyetso cy’uko umubare wazo ukomeje kwiyongera kandi ko zimaze kumenyera neza ubuzima bwo muri pariki.
Abakurikirana inkura bakora igenzura rya buri munsi ku butaka no mu kirere kugira ngo bakurikirane aho ziri n’imiterere y’ubuzima bwazo.
Mu kurinda inyamaswa, abarinzi ba pariki bakoze amarondo agera kuri 1.600 mu mezi atatu, aho bagenze ibilometero bigera kuri 35.000.
Muri icyo gihe nta nyamaswa yishwe n’bahiga mu buryo butemewe, mu gihe hafashwe abarobyi batanu barobaga mu buryo butemewe ndetse hakurwaho imitego 12.
Abakurikirana inkura banditse amakuru y’uko babonye inkura z’umweru zirenga 2.600 ndetse n’inkura z’umukara zirenga 400, binyuze mu bikorwa bya buri munsi byo gukurikirana inyamaswa bagenda n’amaguru no mu ndege. Ibi bigaragaza ko izi nyamaswa zikomeje kugira ubuzima bwiza kandi ko umubare wazo ukomeje kwiyongera mu buryo bushimishije.
Muri iki gihembwe, ibikorwa byo kwegera abaturage byageze ku barenga 31,000, mu gihe imishinga y’ubucuruzi y’abaturage ifashwa na Pariki yinjije hafi ibihumbi 500$ ( hafi miliyoni 730 Frw).
Ubuyobozi bwa Pariki y’Akagera kandi bwatangaje ko muri Kamena 2026, The Lux Collective yatangije ku mugaragaro SALT of Akagera, Hotel yubatse ku nkengero z’Ikiyaga cya Ihema.
Iyi hoteli ifite ibyumba 60, ni yo yahoze yitwa Akagera Game Lodge yari isanzwe icungwa na Mantis Collection kuva mu 2017. Ni yo hoteli ya mbere mu cyiciro cya safari ya SALT ifunguye mu Rwanda.
Muri icyo gihe kandi, Pariki y’Akagera yakomeje no gufasha abaturage bayituriye binyuze mu makoperative akora ibikorwa bitandukanye birimo uburobyi, ubworozi bw’inzuki, kuyobora ba mukerarugendo n’ubukorikori.
Muri icyo gihembwe, ayo makoperative yinjije 226.263$, mu gihe andi 229.374$ yageze mu baturage binyuze mu kugura ibicuruzwa na serivisi mu baturage.
