Sosiyete y’indege yo muri Qatar, Qatar Airways, yongeye gusubukura ingendo zayo zijya i Kigali nyuma y’imyaka itatu yari ishize zihagaritswe kubera ingaruka zatewe n’icyorezo cya COVID-19.
Nk’uko byatangajwe n’Ikigo cy’Igihugu gishinzwe ibibuga by’indege, Rwanda Airports Company (RAC), iyi sosiyete izajya ikora ingendo enye mu cyumweru za Doha – Kigali.
Izi ngendo zizafasha abava mu Burasirazuba bwo hagati gukorera ingendo muri Afurika ku buryo bworoshye, cyane ko ikibuga cy’indege cya Qatar cyakira abagenzi benshi baturutse impande z’Isi.
Qatar Airways ni imwe mu masosiyete y’indege akomeye ku rwego mpuzamahanga, izwiho serivisi zinoze ndetse n’igicumbi cy’ingendo zerekeza mu bice byose by’Isi.
Mbere y’uko ingendo zihagarikwa mu 2020, iyi sosiyete yari isanzwe ikorera i Kigali, ikahageza abagenzi baturutse mu bihugu bitandukanye by’Aziya, u Burayi, Amerika n’Abarabu.
Kugaruka kwayo ku Kibuga Mpuzamahanga cy’Indege cya Kigali ni igisubizo ku bagenzi n’abacuruzi benshi bari bamaze igihe batoroherwa n’ingendo.
Iyi gahunda nshya y’ingendo izajya iba kane mu cyumweru, ikazajya ihuza Kigali na Hamad International Airport i Doha, kimwe mu bibuga by’indege byiza kurusha ibindi ku Isi.
Byitezwe ko izi ngendo zizatangira mu byumweru biri imbere, ndetse Qatar Airways ikaba iri gutegura ibikorwa byose byo kwakira abagenzi bayo ku buryo bwizewe kandi butekanye.
