Rayon Sports yatsinze Mathare United yo muri Kenya ibitego 3-0 mu mukino wa gicuti wakinwe kuri iki Cyumweru tariki 16 Kanama 2026 muri Kigali Pele Stadium.
Ibitego bya Rayon Sports byatsinzwe na Boris Gbenou ku munota wa 37 nyuma y’umupira yari ahawe na Ndayishimiye Didier, Iradukunda Elie Tatou ku munota wa 83 watsinze igitego cya koruneri (Corner) na Muhoza Daniel watsinze igitego ku munota wa 87.
Boris Gbenou na Iradukunda Elie Tatou ni ubwa mbere bari batsindiye igitego Rayon Sports, mu gihe Muhoza Daniel ari igitego cya 3 atsindiye iyi kipe yambara ubururu n’umweru.
Rayon Sports yari yateguye uyu mukino mu rwego rwo kwerekana igikombe cya CECAFA Kagame Cup iheruka kwegukana itsinze Gor Mahia yo muri Kenya ndetse iki gikombe cyari no kuri Sitade aho abafana bashoboraga kukifotorezaho.
Umutoza Haringingo Francis Christian wa Rayon Sports yahisemo gukoresha abakinnyi basanzwe batabanza mu kibuga uhereye ku muzamu Mugisha Yves, Nshimimana Fabrice wari kapiteni, Ndayishimiye Didier, Matumona Wakonda, Nisingizwe Christian, Nkundimana Fabio, Tambwe Gloire Ngongo, Boris Gbenou, Hakizimana Zuberi na Nizeyimana Mubarah.
Nshuti Didier niwe mukinnyi wenyine wabanje mu kibuga usanzwe ubanzamo muri Rayon Sports.
Ibi ntabwo byabujije Rayon Sports kwitwara neza, itsinda Mathare United ibitego 3-0 ndetse inayirusha bigaragara mu kibuga kuko Mathare ntan’uburyo bufatika yigeze igira imbere y’izamu bwashoboraga kubyara igitego.
Mathare United si umukino wayo wa mbere yari ikinnye n’ikipe yo mu Rwanda kuko yanatsinzwe na APR FC igitego 1-0.
Iyi kipe yo muri Kenya iri mu Rwanda aho iri kwitegura umwaka utaha w’imikino ikina imikino ya gicuti n’amakipe yo mu Rwanda.
Uyu wari umukino wa mbere Rayon Sports ikinnye nyuma yo gutwara CECAFA Kagame Cup ndetse wongeye gutanga ibyishimo n’icyizere cyo kuzitwara neza mu mwaka utaha w’imikino by’umwihariko no kungera kwitwara neza ku ruhando rw’Afurika ikajya mu matsinda ya CAF Confederation Cup.
Rayon Sports yakinnye uyu mukino idafite abakinnyi babiri aribo Ibrahim Djingarey na Ganijuru Ishimwe Elie ufite ikibazo cy’imvune, ni mu gihe Mokono Elie ‘Eldihno’ iherutse gusinyisha ategerejwe mu Rwanda kuri uyu wa mbere naho Mohamed Outtara nawe iherutse gusinyisha ategerejwe mu Rwanda ku wa Kabiri.
Rayon Sports izongera gukina ku wa Gatatu tariki 19 Kanama 2026 kuri Kigali Pele Stadium aho izakina umukino wa gicuti n’ikipe ya Al-Ahli Wad Medani yo muri Sudani.
