Sosiyete ya RwandAir yegukanye igihembo cy’umwaka wa 2026 cy’indashyikirwa mu gutanga serivisi zitangirwa mu ndege ku mugabane wa Afurika, mu bihembo bizwi nka ‘APEX Best Awards 2026.’
Ni igihembo RwandAir yegukanye mu birori byabereye mu nama ya APEX FTE EMEA 2026, yabareye i Dublin muri Irlande.
Ni ibihembo bihabwa ibigo by’indege byitwaye neza mu gutanga serivisi nziza mu byiciro bitandukanye birimo serivisi zitangirwa mu ndege, amafunguro n’ibinyobwa, imyidagaduro na interineti.
Mu gutanga ibihembo bya ‘APEX Best Awards’ hashingirwa ku bitekerezo n’isuzuma bitangwa n’abagenzi ubwabo mu ibanga nyuma yo gukoresha indege zitandukanye.
Muri uyu mwaka wa 2026, isuzuma ryakozwe hifashishijwe amanota yatanzwe n’abagenzi barenga miliyoni bakoze ingendo mu ndege zirenga 600 ku Isi.
Mu byatumye RwandAir itwara iki gihembo harimo uburyo abakozi bayo bakira kandi bagafasha abagenzi, isuku n’imiterere y’indege, uburyo abagenzi hahabwa ibiribwa n’ibinyobwa, kwita ku bagenzi mu rugendo kuva rutangiye kugera rurangiye ndetse n’imyitwarire n’ubunyamwuga bw’abakozi b’indege.
Abagenzi bagaragaje ko RwandAir ikomeje gutanga serivisi zinoze ugereranyije n’izindi sosiyete nyinshi zo muri Afurika muri icyo cyiciro.
Iki gihembo kije gikurikira ibindi bihembo RwandAir yagiye ihabwa mu myaka ishize, harimo icyo yahawe mu 2025 nka sosiyete nziza ya mbere mu zikorera ubwikorezi bwo mu kirere ku mugabane wa Afurika yatsindiye mu bihembo bya Skytrax.
Mu myaka yashize RwandAir yakomeje gushora imari mu kuzamura serivisi z’abagenzi no kunoza umutekano n’imikorere y’indege zayo.
Kuri ubu ikomeje kwagura imiyoboro yayo y’ingendo ihuza Kigali n’ibihugu byinshi byo muri Afurika, u Burayi, Uburasirazuba bwo Hagati na Aziya n’ahandi.
Gutsindira igihembo cya APEX Best Cabin Service ni ikimenyetso cy’uko RwandAir iri mu masosiyete y’indege akunzwe kandi yizewe muri Afurika, cyane cyane mu rwego rwa serivisi ihabwa abagenzi bari mu ndege.
