Minisiteri y’Ibikorwaremezo (MININFRA), ku bufatanye n’abafatanyabikorwa mu iterambere ry’imijyi, yatangije amahugurwa y’iminsi itatu agamije kongerera ubushobozi uturere mu gutegura no gushyira mu bikorwa gahunda z’iterambere ry’imijyi.
Aya mahugurwa ari kubera mu Karere ka Musanze, yatangijwe kuri uyu wa Gatatu tariki 12 Kanama 2026. Yitabiriwe n’abayobozi ku rwego rw’uturere ndetse n’abakozi bafite ubumenyi bwa tekiniki mu bijyanye n’iterambere ry’imijyi.
Minisiteri y’ ibikorwa remezo ivuga ko aya mahugurwa agamije kongerera ubushobozi abayobozi n’abakozi b’uturere mu gutegura no gushyira mu bikorwa imishinga itanga ibisubizo bishingiye ku miterere kamere ifite ireme.
Ni mu rwego rwo kongera ubushobozi bwo guhangana n’imihindagurikire y’ikirere, guteza imbere imiturire irambye no kuzamura ubukungu bw’aho abaturage batuye.
Bitegayijwe ko abayitabiriye baraganira ku buryo bwo kunoza igenamigambi n’imicungire y’iterambere ry’imijyi ku rwego rw’uturere, ndetse no ku ruhare rw’inzego z’ibanze mu gutuma gahunda z’imitunganyirize y’imijyi zishyirwa mu bikorwa neza.
MININFRA ivuga ko kongerera ubushobozi uturere ari ingenzi mu gutuma igenamigambi ry’imijyi rikorwa neza kuva ku rwego rw’igihugu kugeza ku rwego rw’akarere, kandi rikajyana n’ibikenewe n’abaturage.
UMWANDITSI: DIANE MUREKATETE/UMUNOTA
