Abanyarwanda n’inshuti z’u Rwanda bahuriye ku Rwibutso rwa Jenoside rwa Kigali ruherereye ku Gisozi mu muhango wo gutangiza icyumweru cy’icyunamo n’iminsi 100 yo Kwibuka ku nshuro ya 32 Jenoside yakorewe Abatutsi mu 1994.
Tariki ya 7 Mata ni umunsi mpuzamahanga wo kwibuka Jenoside yakorewe Abatutsi, aho u Rwanda n’Isi muri rusange bifatanya kwibuka inzirakarengane zirenga miliyoni imwe zishwe mu gihe cy’iminsi 100.
Perezida wa Repubulika y’u Rwanda, Paul Kagame, ari kumwe na Madamu Jeannette Kagame, bifatanyije n’abandi bayobozi mu gutangiza ibi bikorwa byo Kwibuka, aho bacanye urumuri rw’icyizere ruzamara iminsi 100, rugaragaza icyerekezo cy’ejo hazaza heza.
Mbere yo gucana uru rumuri, Perezida Kagame na Madamu Jeannette Kagame babanje gushyira indabo ku mva rusange zishyinguyemo imibiri y’abazize Jenoside, banunamira inzirakarengane zigera ku bihumbi 250 ziruhukiye mu rwibutso rwa Jenoside rwa Kigali ruri ku Gisozi.
Ibi bikorwa byitabiriwe n’abayobozi batandukanye, abahagarariye ibihugu byabo mu Rwanda, n’imiryango mpuzamahanga, bose bagaragaje ko kwibuka ari inshingano idasanzwe igamije gusigasira amateka no gukumira ko Jenoside yakongera kubaho ukundi.
Icyumweru cy’Icyunamo kizakomeza kirangwa n’ibikorwa bitandukanye birimo ibiganiro, ubuhamya bw’abarokotse Jenoside, n’ibikorwa byo gufasha abahuye n’ingaruka zayo, mu gihe iminsi 100 yo Kwibuka izakomeza guha Abanyarwanda umwanya wo kuzirikana amateka no gukomeza kubaka ubumwe n’ubudaheranwa.
