Diyosezi ya Butare yatangaje ko umuhango w’itangwa ry’ubwepisikopi kuri Musenyeri Jean Bosco Ntagungira, uteganyijwe ku itariki ya 5 Ukwakira 2024, mu gitambo cya misa kizabera kuri katedrali ya Butare.
Ku itariki ya 12 Kanama 2024, nibwo umushumba wa kiliziya Gatolika kw’Isi, Papa Francisco, aherutse kwimika Padiri Jean Bosco Ntagungira, nk’umwepiskopi mushya wa Diyosezi ya Butare, asimbuye Musenyeri Phillipe Rukamba,ugiye mu cy’iruhuko cy’izabukuru.
Padiri Ntagungira yari asanzwe ari Padiri Mukuru wa Paruwasi ya Regina Pacis muri Arikidiyosezi ya Kigali.
Yavutse ku wa 3 Mata 1964, yiga mu Iseminari nto ya Rutongo mbere yo gukomereza mu nkuru ya Nyakibanda.
Yahawe Ubusaseridoti ku wa Mbere Kanama 1993 muri Arikidiyosezi ya Kigali.
Yabaye Umuyobozi ushinzwe amasomo mu Iseminari Nto ya Ndera kuva mu 1993 kugera mu 1994.
Yahawe Impamyabumenyi y’Ikirenga mu mategeko ya Kiliziya nyuma yo kurangiza amasomo muri Kaminuza y’i Roma mu Butaliyani (Pontifical Lateran University) aho yize kuva mu 1994 kugera mu 2001.
Yabaye Umuyobozi ushinzwe Iyogezabutumwa muri Arikidiyosezi ya Kigali kuva mu 2001 kugera mu 2002 mbere yo kuba Umuyobozi wa Seminari Nto ya Mutagatifu Vincent ya Ndera.
