Ikipe ya Police VC iri mu biganiro bya nyuma n’abakinnyi Niyigena Jules ukina nka libero na Nkurunziza John ukina hagati (Middle blocker) nyuma y’uko barangije amasezerano muri Kepler VC itazitabira Shampiyona y’umwaka utaha w’imikino.
Amakuru aremeza ko Niyigena wanahawe igihembo cya libero mwiza wa Shampiyona y’uyu mwaka yamaze gutangira imyitozo muri Police VC, iyi kipe ikaba imushaka nyuma y’uko uwari libero wayo Manzi Sadulu yamaze gusubira muri APR VC nyuma y’imyaka ibiri yari amaze muri Police VC.
Niyigena wakiniye andi makipe arimo UTB, REG VC, EAUR VC na Gisagara VC yitezweho gufatanya na Irakoze Alain na Matsiko Salomon basanzwe muri Police VC.
Nkurunziza John we aravugwa muri Police VC mu gihe mbere y’uko ajyana n’ikipe y’Igihugu mu Gikombe cya Afurika cyabereye muri Tunisia yavugwaga muri Gisagara VC.
Police VC irifuza Nkurunziza kugira ngo yongere imbaraga hagati ndetse ni umukinnyi nawe ufite ubunararibonye kuko yakiniye andi makipe atandukanye arimo Gisagara VC na UTB VC.
Ikiganiro Umunota uheruka kugirana na Imana Isaac Rabbin ushinzwe itumanaho ndetse akaba n’umuvugizi w’amakiep ya Police ya volleyball (Abagore n’abagabo), yavuze ko ikipe y’abagore yarangije gusinyisha ariko ikipe y’abagabo igikeneye kongeramo imbaraga.
Kugeza ubu Police VC yasinyishije abakinnyi babiri bashya aribo Matheus Bettim ‘Sekamana’ ukina yataka (Outside hitter) wari umaze umwaka akina muri Brazil na Ganza Nolan Enzo ukina asaranganya imipira (Setter) wari urangije amashuri yisumbuye muri Nyanza TSS.
Kuva Police VC yashingwa muri 2021 yitwa Forefront VC ntabwo irabasha gutwara igikombe cya Shampiyona n’ubwo ibindi bikombe yagiye ibitwara.
