Ihuriro Alliance Fleuve Congo (AFC/M23) ryatangaje ko ryinjije mu gisirikare cyaryo abasirikare bashya 9,318 barangije amahugurwa yihariye ya gikomando, mu muhango wabereye i Tchanzu, muri Teritwari ya Rutshuru mu Ntara ya Kivu y’amajyaruguru, kuwa 20 Nyakanga 2026.
Nk’uko ubuyobozi bwa AFC/M23 bubitangaza, aba basirikare bashya bagiye kongerera imbaraga igisirikare cy’iri huriro mu bikorwa byo kubungabunga umutekano no kurinda abaturage batuye mu bice rigenzura.
Umuhango wo gusoza ayo mahugurwa witabiriwe n’abayobozi bakuru ba AFC/M23, barimo Umugaba Mukuru w’igisirikare cyayo M23, Gen. Sultan Makenga, wavuze ku kibazo cy’umutekano mu burasirazuba bwa Repubulika Iharanira Demokarasi ya Congo ndetse n’impamvu AFC/M23 ivuga ko yahisemo gukorana n’umutwe wa MRDP-Twirwaneho.
Mu ijambo rye, Gen. Makenga yavuze ko ihuriro rigizwe na FARDC, ingabo z’u Burundi, imitwe ya Wazalendo na FDLR ryari rifite umugambi wo kugaba ibitero ku Banyamulenge ndetse n’abarindaga umutekano wabo.
Yavuze ko ari muri urwo rwego MRDP-Twirwaneho yafashe icyemezo cyo kwitwaza intwaro kugira ngo irengere abaturage b’Abanyamulenge, ivuga ko ubuzima bwabo bwari mu kaga.
Yakomeje avuga ko AFC/M23 yahisemo gutera inkunga MRDP-Twirwaneho kuko yabonaga ko urwo ruhande bahanganye rwari rufite imbaraga nyinshi, bityo abaturage bakaba bakeneye ubufasha bwo kubarinda.
Gen. Makenga yavuze kandi ko ubufatanye hagati ya AFC/M23 na MRDP-Twirwaneho bwagize uruhare mu guhindura isura y’umutekano mu bice bimwe byo muri Kivu y’amajyepfo, cyane cyane mu Minembwe no mu tundi duce dutuwe n’Abanyamulenge.
Yongeye gushimangira ko, nk’uko AFC/M23 ibivuga, abaturage b’Abanyamulenge bafite umutekano uruta uwo bari bafite mbere, ashimangira ko intego y’iri huriro ari ugukomeza kurinda abaturage no gukumira ibikorwa byose bishobora guhungabanya umutekano.
Ku ruhande rwe, Umuvugizi wa AFC/M23, Lawrence Kanyuka, yavuze ko kwinjiza aba basirikare bashya ari intambwe ikomeye mu kongerera ubushobozi ARC (Armée Révolutionnaire Congolaise), igisirikare cy’iri huriro.
Yasobanuye ko aba basirikare bamaze amezi menshi bahabwa imyitozo ya gikomando irimo amasomo atandukanye ya gisirikare, kandi ko barangije biteguye gusohoza inshingano zo kurinda abaturage no gukomeza ibikorwa bya gisirikare mu bice AFC/M23 igenzura.
Mu rwego rwo kwerekana ubumenyi bungutse, aba bakomando bashya bakoze imyiyereko ya gisirikare irimo kurwanisha imbaraga z’umubiri, guteranya no gusenya imbunda mu gihe gito, ubuhanga bwo kurasa ndetse n’andi masomo agaragaza urwego rw’imyitozo bahawe.
