U Rwanda rwisanze mu Itsinda A hamwe na Tanzania na Ethiopia mu mikino ya CECAFA yo gushaka itike y’Igikombe cya Afurika cy’umupira w’amaguru cy’Abatarengeje imyaka 20 kizabera muri Tanzania kuva tariki 15 Nzeri kugeza tariki 25 Nzeri 2026.
Kuva ku wa Gatanu tariki 28 Kanama kugeza ku Cyumweru tariki 30 Kanama 2026, yari impera z’icyumweru ndetse zikaba iza nyuma z’uku kwezi.Muri iyi minsi itatu habayemo ibintu byinshi mu mikino n’imyidagaduro byasize inkuru nyinshi ku mbuga nkoranyambaga n'ubu bikigarukwaho mu ntangiriro z'iki Cyumweru.Muri iyi nkuru Umunota ugiye kugaruka ku bintu byabaye mu mpera z’icyumweru gishize mu gisata cy’imikino n’imyidagaduro
Ikipe ya Kiyovu Sports yegukanye igikombe kiruta ibindi mu Rwanda, FERWAFA Turbo King Super Cup 2026, nyuma yo gutsinda Police FC igitego 1-0 ku mukino wa nyuma.
Umuhanzi Diamond Platinumz wo muri Tanzania uri mu bakomeye muri Afurika y'Iburasirazuba no muri Afurika muri rusange, yageze i Kigali mu Rwanda aho yitabiriye igitaramo azahakorera kizabera muri Parking ya BK Arena kuri uyu wa Gatandatu tariki 29 Kanama 2026.
Ikipe ya Police FC yasezereye Rayon Sports muri 1/2 mu irushanwa ry’igikombe kiruta ibindi, FERWAFA Turbo King Super Cup 2026, iyitsinze kuri penaliti 4-2 nyuma y’uko amakipe yombi yari yanganyaije 0-0 mu mikino 90 isanzwe y’umukino.
Ikipe ya Kiyovu Sports yageze ku mukino wa nyuma w'igikombe kiruta ibindi, FERWAFA Turbo King Super Cup 2026, nyuma yo gusezerera Mukura VS&L muri 1/2 iyitsinze igitego 1-0.
Kuri uyu wa kane tariki 27 Kanama 2026, umunyamakuru w’imikino kuri Radio/TV 10 Hitimana Jean Claude uzwi nka Hit yasezeranye imbere y’amategeko n’umukunzi we Ishimwe Muhayimpundu Adelaide uzwi nka Ida nawe uherutse gusezera kuri iki gitangazamakuru cya Radio/TV 10.
Ikipe y’igihugu y’u Rwanda y’abagore mu mukino wa volleyball yitwaye neza itsinda ikipe y’igihugu y’u Burundi amaseti 3-0 biyiha kurangiza imikino y’amatsinda iyoboye itsinda D mu Gikombe cy’Afurika kiri kubera i Nairobi muri Kenya.
Myugariro w’umunyarwanda Rwatubyaye Abdul yerekeje mu ikipe ya KF Shkëndija Haraçinë 77 ikina icyiciro cya mbere muri Macedonia nyuma yo gutandukana n’ikipe ya Al-Soqour Club yo muri Libya yari amaze umwaka akinira.
