Umusifuzi mpuzamahanga w'umunyarwanda mu mukino wa volleyball, Ndayisaba Alphonse, yerekeje i Santiago muri Chile aho agiye gusifura imikino y'Igikombe cy'Isi cy'abatarengeje imyaka 17 mu bangavu, kizakinwa kuva tariki 6 Kanama kugeza tariki 16 Kanama 2026.

Ikipe y'Igihugu y'u Rwanda ya basketball y'abatarengeje imyaka 18 mu ngimbi, yisanze mu itsinda C hamwe na Cameroon, Tunisia na Senegal mu irushanwa ry'Igikombe cya Afurika rigiye kubera i Abidjan muri Côte d'Ivoire kuva tariki 5 Kanama kugeza tariki 16 Kanama 2026.

Umunyarwanda ukina mu kibuga hagati, Mugisha Bonheur 'Casemiro' yerekeje mu ikipe ya Al-Hazem Saudi Club ikina icyiciro cya mbere muri Saudi Arabia, Saudi Pro League, avuye mu ikipe ya Al Masry yo mu Misiri yari amazemo umwaka umwe.

Impuzamashyirahamwe y'Umupira w'Amaguru muri Afurika y'Iburasirazuba no Hagati (CECAFA), yatangaje ko umusifuzi w'umunya-Somalia Omar Abdulkadir Artan ariwe uzasifura umukino wa nyuma wa CECAFA Kagame Cup utegerejwe tariki 7 Kanama 2026.

Ikipe ya Rayon Sports yatsinze ikipe ya Al Hilal SC Omdurman yo muri Sudani igitego 1-0 imbere ya Minisitiri w’Intebe w’u Rwanda, Nsengiyumva Justin, bituma izamuka muri 1/2 ari iya mbere mu itsinda C.

Ikipe ya Azam FC yo muri Tanzania yamaze guhaguruka i Dar es Salam yerekeza i Kigali mu Rwanda aho igiye gukorera umwiherero yitegura umwaka utaha w'imikino wa 2026/27 urimo na CAF Confederation Cup.

Ishyirahamwe ry'Umupira w'Amaguru mu Rwanda, FERWAFA, ryatumiye amakipe 4 ya mbere muri Shampiyona y'umwaka wa 2025/26 mu irushanwa ry'Igikombe Kiruta ibindi (Super Cup) ariyo APR FC, Rayon Sports, Kiyovu SC na Police FC, byemeza ko iki Gikombe kizamaranirwa n'amakipe 4 aho kuba abiri nk'uko byari bisanzwe.

Umukinnyi w'umunyarwanda Byiringiro Lague yamaze kumvikana n'ikipe yo muri Afurika y'Epfo ikina icyiciro cya mbere ya Durban City FC ko yayerekezamo nyuma yo kurangiza amasezerano mu ikipe ya Police FC, igatangaza ko itazamwongerera.